Virginia Diazek ondo ekin dio denboraldiari, eta podiumeko lehen tokira igo da nazioarteko lehen hitzordu nagusian, skiff-ean, munduko zirkuituari dagokion Zagrebeko (Kroazia) Munduko Kopan. Gainera, erakustaldia eman du eta urduritasuna ondo kontrolatuta, estropadaren azken zatian erasoa jotzeko uneari zuhurtziaz itxaron dio.
Bihotzekoa eragiteko moduko azken partziala egin du, eta, horren ostean, lasterketa argazki finish-aren bidez erabaki behar izan da. Virginiaren lorpenaz gain, Izaskun Echanizek zilarrezko domina irabazi du lemazainik gabeko laukoan.