Anne Mateosek, Africa Villatek, Luzia Redondok eta Uxue Ruizek lehen titulu nazionala lortu dute
Sestao EEak historia egin du Galizian. Anne Mateosek, Africa Villatek, Luzia Redondok eta Uxue Ruizek irabazi dute 15 urtez azpiko hondartza boleiboleko Espainiako Txapelketa. Aurrekaririk gabeko mugarria, klubaren filosofia bikain gorpuzten duen talde batek lortua. 2011ko belaunaldiko lau jokalari, guztiak sestaoarrak eta 7 urtetik beheragoko mailetan heziak, Sestao EEko harrobia osatzen duten kirolarien piramide handia urrez busti dutenak.
Talde berdebeltzak aste magiko bat egin du Dumbriako harearen gainean. Lehenengo, Anne Mateosek eta Africa Villatek, 14 urterekin, lehen poza eman zuten 19 urtez azpiko Espainiako Txapelketan bosgarren postu bikaina sinatuz. Paki Blancoren gidaritzapean, Luzia Redondorekin eta Uxue Ruizekin partekatuko zuten helburu handirako balio izan zuen emaitza bikaina.
Laukote sestaoarrak bere sei partidak irabazi ditu, Oviedoko San Inazioren aurkako finala barne, tie breakean erabakitako partida zirraragarri batean (21-18, 14-21 eta 15-9).
“Oso pozik, oso pozik eta izugarri harro gaude jokalariengatik. Behetik gora egin dute, partida guztiak irabazita, eta azkenean txapelketa handia izan da. Finala oso estua egon da, baina uste dut haizearen handicapa ondo kontrolatu dugula eta teknikoki hobeto egon garela. Bultzatzen gaituen, indarra ematen digun eta bide zuzenetik goazela baieztatzen duen aparteko saria da “, nabarmendu du Cesar Ruiz Sestaoko EEko presidenteak.
